Folkemusikk

Jo Einar Jansen:

Naken

Ta:lik

Dette er platedebuten til den unge felespelaren Jo Einar Jansen frå Frosta i Trøndelag. Og tittelen og omslagsfotoet er ikkje berre gimmick, for her er det berre den unge mannen med fela, som på einskilde spor blir bytt ut med hardingfele, oktavfele eller song, som kling.

Musikken er naken i den tydinga at slåttane er solistisk framførte, anten dei er tradisjonelle eller meir improvisatoriske i karakteren.

Og det er nettopp denne vekslinga mellom solid tradisjonsforvalting og nyskaping som er så typisk for mange av dei yngre folkemusikkutøvarane – også Jansen.

Noko er av ukjent opphav, det ein ofte kallar tradisjonelt, medan noko er sjølvlaga. Her vekslar temmeleg stramt framførte danseslåttar med lyriske og deklamatoriske melodiar, og av og til er uttrykket rocka og rufsete. Han overraskar oss dessutan med å stryka over to strenger samstundes medan han langsamt stemmer den djupaste langt ned – gradvis og langsamt.

Sist – men ikkje minst – vil eg nemna det viktigaste aspektet ved Jansens spel: Det verkar aldri automatisert, og spesialeffektar verkar alltid musikalsk relevante, sidan det alltid er ein vilje til kommunikasjon som gjennomsyrar spelet. Den nakne mannen med fela vil seia oss noko, og det klarer han godt.

Sigbjørn Apeland

Sigbjørn Apeland er musikar, musikkvitar og fast platemeldar i Dag og Tid.