Brekande kontratenor

Vivaldis mest kjende og oftast innspelte kyrkjemusikkstykke er nok den spenstige Gloria-tonesetjinga, RV 589, som truleg blei komponert for å feira Venezias siger over tyrkarane på øya Korfu i 1716. Framføringa til det sveitsiske orkesteret I Barocchisti og Coro della Radiotelevisione svizzera (koret til Sveits’ italienskspråklege allmennkringkastar) er livfull og spretten. Fin er òg den slanke, skimrande sopranrøysta til russiske Julia Lezhneva, som har ei særeiga ro over seg. Så langt, alt vel. Men den argentinske kontratenoren Franco Fagoli er som ein parodi på stemmefaget sitt, med brekande vibrato og geitete nasal klang, noko som gjer at eg i framtida vil kvi meg for å setja denne elles så framifrå plata i spelaren.