Jazz

Skydive Trio:

Sun Sparkle

Thomas T. Dahl, gitar; Mats Eilertsen, bass; Olavi Louhivuori, trommer
Hubro HubroCD2596

Trioen vekte med rette oppsikt i 2015 med debuten Sun Moee. Samarbeidet dei tre imellom går endå lenger attende i ymse konstellasjonar i Eilertsens namn. Musikken var sett saman av forførande melodiar, raffinert harmonikk, «laus» rytmikk og luftig og gjennomsynleg lydbilete, men det lyttande samspelet var kanskje det mest oppsiktsvekkjande. Dei same kvalitetane fører trioen vidare på oppfølgjaren.

Den største skilnaden frå debuten er at trioen på Sun Sparkle også har skaffa seg ein rockefot å stå på. På fleire kutt er rytmikken fastare og meir bastant, og Eilertsen har på ein del spor skifta ut kontrabassen med den elektriske halvbroren. Dette som ved første gjennomhøyring verkar som eit markant stilskifte, er berre ei ytre form som ikkje endrar essensen i uttrykket til trioen. Opningssporet «Launch» av Eilertsen er eit glimrande døme. Med stødig rockefot og ein harmonikk som gjev næring til illusjonen om at noko faktisk kan veksa inn i himmelen, har dei lagt eit fundament som Dahl med ei nydeleg forma melodistemme emosjonelt dreg i ei anna lei. Ambivalensestetikk er ein raud tråd plata gjennom.

Sjølv om trioen har såkalla flat struktur, og namnet på trioen understrekar nettopp dette, er Sun Sparkle i endå sterkare grad enn debuten eit utstillingsvindauge for Dahl. Dette er eit paradoks ved plata. Dahl har berre signert éin av dei ti låtane. Resten står dei to andre for. Når eg likevel gjer dette til eit sentralt poeng, kan tittelkuttet til Louhivuori illustrera dette. Her spelar Dahl på heile registeret. Kompspelet, måten han formulerer og reformulerer temaet på, ornamentikken og dei korte flatene med formsikker improvisasjon er alt saman med på å gjera Sun Sparkle til ei heilt unik lytteoppleving.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.