Blues

Good Time Charlie:

Lakenskrekk

Arle Hjelmeland, vokal og munnspel; Steinar Karlsen, gitar, orgel, perkusjon og vokal; Morten Skage, bass, orgel, gitar, perkusjon og vokal; Einar Olsson, trommer og perkusjon; Kåre Sandvik, piano (2,10 og 11) Good Time Charlie Records

Good Time Charlie følgjer opp suksessen frå Draumeblues og blåsus og Jubel og skrubbsår. Arle Hjelmeland har skrive tekstane og Morten Skage er den sentrale komponisten. Han har levert seks og er medansvarleg for to av i alt elleve låtar.

Musikken er ei fin legering av New Orleans-farga blues og britisk 60-tals poprock. Musikalsk er kanskje dette den beste barneplata så langt. Det skal spesielt Skage ha ære for. Låtane er fengande og fungerer i det allsongkonseptet dette er ein del av.

Ordspel

Hjelmeland likar å leika med språket. Tekstane har ei mengd ordspel som garantert fungerer hjå den yngre delen av publikum. Hjelmeland fortel om han som finn alle moglege grunnar til å ikkje bli med på tur, om det fortreffelege ved å bu på bondegard, om den intense gleda ved å hoppa i sølepyttar, om skjulestaden som er så superhemmeleg at ein ikkje finn han att, og mykje meir som både born og vaksne kan kjenna seg att i.

Halvvegs

I «Trenaren har tørna» teiknar Hjelmeland eit vemodig bilete av fotballspelaren som alltid sit på benken og ser at laget tapar kamp etter kamp. Her er Hjelmeland i ferd med å fortelja ein kvardagstragedie slik han gjorde i «Båt i hagen», men i staden for å fullføra gjer han historia om til ei banal «gladsak» der benkeslitaren lagar basar, kjøper gitar og så vidare. Diverre er plata skjemd av ein del naudrim og verselinjer som haltar. Det er synd, for musikalsk fungerer det betre enn nokon gong før.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.