Radioserie

Jonathan Richman:

Just a Spark, On Journey From the Dark

Blue Arrow Records

Radioserie

Annie Clark:

St. Vincent: Words + Music

Audible

Musikkradioen lever i beste velgåande i den digitale tidsalderen. Kanskje høyrer også sjangeren til mellom dei som ser ein ny vekst når den globale pandemien herjar, med få konsertar og mange heimekveldar som følgje? I løpet av det siste halvåret er det ikkje få artistar som har funne nye måtar å kommunisere med publikum på. Med det oppstår det også nye former for formidling og kontakt.

Det er altså dårlege tider for mangt, men ikkje for musikkradio. Mangfaldet er stort, i innhald og format, og spenner frå det spontane til det langtidsplanlagde, frå lågskala til høgskala produksjonar – noko ferske bidrag frå Jonathan Richman og Annie Clark illustrerer godt.

Sistnemnde er først ut i «Words & Music», ein nylansert serie frå den amerikanske lydbokgiganten Audible, som har inngått ein avtale med produksjonsselskapet Gunpowder & Sky. Det inneber profesjonalitet i alle ledd, og eit strigla produkt, men også ei kvalitetssikring som held mål for ein artist som St. Vincent.

Kontrastar

Det er likevel eit viktig poeng at det er Annie Clark vi får eit møte med, mennesket bak artistnamnet St. Vincent, snarare enn den populærkulturelle figuren ho har konstruert og opptrer som. At skiljet er viktig, kjem fram fleire gonger i løpet av programmet, der Clark fortel om kvifor ho valde eit slikt namn, og kor merkeleg det er å skulle balansere mellom to ulike typar tilvære. Er du vand med jubel frå titusenvis av fans den eine kvelden, vert det brått taust når du kjem heim etter ein turné, for det er ingen applaus å vente når du lagar toast på kjøkkenet. Det dreier seg om vanvittige kontrastar, som fører med seg gåver, men og kostnader.

Clark er ein framifrå forteljar og ein reflektert observatør. Vi får høyre nokre velvalde songar, og det er fascinerande å finne ut meir om korleis dei vert til, og kva som ligg bak. Ho maktar også å fortelje mykje frå sitt indre og private liv, utan at det nokon gong bikkar over i det tabloide. Vinnarlodda er som kjent ujamt fordelt i det Clark refererer til som «det store dopaminlotteriet», og forteljingar om angst allereie i barneåra gjer inntrykk. Programmet er strukturert som kronologisk livsforteljing, med barndom i Texas og storbyliv i Boston og New York i ung vaksen alder, og det fungerer godt. Dersom nivået er sett med dette, er det berre å sjå fram til komande episodar av «Words & Music», med Sheryl Crow (akkurat ute), Smokey Robinson og Alanis Morrissette.

Observasjonar

Kontrasten er stor til første episode av Jonathan Richmans nye serie «Just A Spark, On Journey From the Dark», der vegen meir vert til når ein går, utan at det gjer noko. Med seg i studio i Chico i California har Richman i første utgåve med seg eit oversiktleg ensemble: Nicole Montalbano trakterer strengeinstrumentet tambura, og elles er Jake Sprechner med på orgel og som opptaksmann.

Allereie frå første sekund vert det herleg klart at vi kan vente oss meir eller mindre kva som helst. I tillegg til ein ny, typisk Richmansk kjærleikssong, får vi ein komposisjon inspirert av artistens minne om heimvegen frå skulen, som var vel åtte kilometer lang og «like lang enten det var sommar eller vinter». Det vesle stykket musikk får Richman til å bryte ut i nokre poetiske observasjonar, og så er dei knappe ti minutta med radio over.

Neste episode skal etter planen vere tilgjengeleg frå sidene til Blue Arrow Records allereie komande tysdag.

Øyvind Vågnes

Øyvind Vågnes er forfattar og fast musikkskribent i Dag og Tid.