Jazz

Mathilde Grooss Viddal:

Notre Dame – Meditations and Prayers

Mathilde Grooss Viddal, Bb-klarinett, bassklarinett, sopran- og tenorsaks; Hayden Powell, trompet; Børge-Are Halvorsen, tenorsaks; Øyvind Brække, trombone; Per Willy Aaserud, trompet og elektronikk. Losen Records LOS 245-2

Viddal held fram der ho slapp med Stabat Mater som kom i fjor. Hayden Powell på trompet erstattar fiolinisten Harpreet Bansal, elles er ensemblet det same. Musikken blei spelt inn i perioden 2013–2016. Besetninga på konsertbandet skifta gjennom desse åra, men kvartetten Viddal, Powell, Halvorsen og Brække gjorde ein del innspelingar i legendariske Rainbow Studio. Desse opptaka er supplerte med tre låtar frå eit konsertopptak i Færvik kyrkje på Tromøya, der Viddal og Aaserud spelar duo.

No er det norsk folkemusikk som står i sentrum, både sakral og profan. Det vil seia at repertoaret skifter mellom arrangerte salme-/folketonar og ein serie refleksjonar («Reflections» I–V) med skissemessige arrangement som utgangspunkt. Musikken forlèt aldri den meditative grunnstemninga, og arrangementa, som er gjorde kollektivt, er dynamiske og har alltid tanke for ensembleklangen.

Stemningane dei manar fram, kan vera både knuande og dystre, men det munnar alltid ut i melodisk vemod. Høgdepunktet er den pulserande «Reflections II» som raskt hintar mot «Det hev ei rosa sprunge». Denne salmen følgjer så i eit aldeles utsøkt arrangement. Dette er musikk for mørke kveldar.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.