Jazz/
Samtidsmusikk

Jon Balke

Discourses

Jon Balke, piano og
elektronikk.
ECM 2648

I ein liten mannsalder har Jon Balke, om han ikkje har vore med i andre sine prosjekt eller del av kollektivet Jøkleba, hatt ein tredelt karriere. Den eine delen har vore med dei store ensembla som Magnetic North og Siwan, den andre med perkusjonsensemblet Batagraf, og del tre har vore som solopianist.

 
Det gjekk ni år frå Book of Velocities (ECM, 2007) til oppfølgjaren Warp (ECM) var eit faktum. Heldigvis har Balke korta utgjevingsfrekvensen. Medan han i utgjevingane med dei store ensembla og Batagraf lar den pulserande grooven vera ein heilt sentral faktor, er det nærast motsett på soloplatene. Det er ikkje tilfeldig at han har kalla den nye plata Discourses. Den offentlege samtalen har blitt polarisert, meiner Balke, og dette er eit musikalsk innlegg som målber trongen for refleksjon og reell samtale.

Plata er sett saman av 16 korte musikalske stemningsbilete som ligg i grenseland mellom det komponerte og det improviserte. I tillegg til å nytta eit breitt spekter av klavertekniske verkemiddel legg han diskret på elektronisk musikk, eller elektronikken tek over for klaveret. Innimellom syner Balke temperament, men oftast er det refleksjonen og kontemplasjonen som rår. Balke har ikkje laga programmusikk, men han stimulerer til spanande assosiasjonar med titlar som «The oppostition», «The deliberation» og «The third afterthought». Jon Balke argumenterer overtydande.

Lars Mossefinn

Lars Mossefinn er lærar ved Voss gymnas og fast jazzmeldar i
Dag og Tid.