Hip hop / soul

Sampa The
Great:

Live Performance: Black August

YouTube

No i koronatida er det som kjent ikkje berre berre å oppleve livemusikk i levande live. Heldigvis eksisterer vi i internettalderen, slik at ein via elektroniske apparat har tilgang til enorme mengder kunst og kultur når og kvar ein vil. Ofte gratis, dessutan.

Ein artist som har vore svært aktiv når det gjeld livekonsertar på internettet dei siste månadene, er Sampa The Great. På YouTube-kanalen hennar har det i løpet av tre månader blitt publisert fire minikonsertar, og i den siste tok den Melbourne-baserte artisten turen til moderlandet sitt, Zambia. Konserten gjekk av stabelen i høvet Black August, ein månad vigd til historia til den svarte motstandsrørsla, og dei donasjonsbaserte inntektene gjekk til familiane og fridomskampanjane til politiske fangar i Sambandsstatane.

I juni sleppte Sampa The Great eit konsertopptak med eit Melbourne-basert backingorkester, og i dette tilfellet var det særleg sterkt å sjå og høyre dei multietniske musikalske makkerane hennar stemme i med knyttneven i vêret under refrenget til låta Final Form: «Black Power!» På Black August-konserten, som inkluderte kjende låtar som denne, i tillegg til premieren på den nye songen This Is The Light, hadde ho med seg eit fullstendig zambisk personskap. Det er forvitneleg kor friskt låtmaterialet høyrest ut når det blir framført av forskjellige musikarkonstellasjonar. I Africa Day Performance-konsertopptaket i mai opptredde ho til dømes saman med berre to koristar og minimalt, rhodes- og percbasert komp. Sampas musikalitet er enorm, og dessutan er scene- og kostymedesignet eit syn for såre augo.

Rasmus Hungnes

Rasmus Hungnes er kunstnar, rytmedoktor og fast musikkmeldar i Dag og Tid.