Jazz

Tore
Johansen:

Sang

Eva Bjerga Haugen, vokal; Tore Johansen, trompet; Tor Yttredal, sopran- og tenorsaks; Vigleik Storaas, piano; Johannes Eick, bass.
INNER EAR INEA27

I oktober 2018 gjorde Tore Johansen opptak i NRK-studioet i Stavanger med Per Ravnaas bak miksebordet. I tillegg til å ha ein av Noregs fremste lydteknikarar på laget, såg Johansen sitt snitt til å få med ein av dei fremste vokalistane i norsk jazz, Eva Bjerga Haugen.

Johansen har sans for gode tekstar og har førebudd denne plata grundig. Han har plukka dikt av Tor Jonsson, Knut Hamsun og Inger Hagerup. Alle tekstane er på norsk. Såleis er dei to Tomas Tranströmer-dikta gjendikta av Jan Erik Vold, Trygve Valøy har gjendikta to Rupert Brooke-dikt og sjølv har Johansen gjeve «A minor bird» av Robert Frost norsk språkdrakt.

Haugen har ei eiga evne til å kombinera tekstformidling med ein krystallklar tone og ei minimalistisk frasering. Ho synte det på plata Hun som kjenner tristheten ved ting med Ketil Bjørnstad, og like overtydande er ho her. Saman med resten av bandet er ho på sitt absolutt beste i Hamsuns «Hvad suser i natten?»

Johansen har laga vakre, vemodige melodiar til dei åtte tekstane. Bandet fell aldri for freisting å endra fokus, men det hindrar ikkje Yttredal, Storaas, Eick og kapellmeisteren sjølv i å levera minneverdige kor utan å røra ved den kontemplative grunnstemninga. Ein gledeleg bonus er det å høyra Johannes Eick betre enn eg kan minnast å ha høyrt han, distinkt, dynamisk og melodiøst med ein mektig tone.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.