Folkemusikk

Kviven duo:

Kvakksalvar-Guri

Kviven Records

Kviven er eit fjell mellom Hornindal i Nordfjord og Austefjorden, sør for Volda. Felespelarane Jorun Marie Kvernberg og Brit Pernille Frøholm nyttar tunnelen som fører E39 gjennom fjellet, som utgangspunkt for å plassera det musikalske samarbeidet: «Holet i fjellet Kviven, og gjennomboringa av mindre fjell, gav moglegheiter for samkvem, og samarbeid og ikkje minst samspel mellom dei to bygdene».

I vår tid handlar ikkje dette så mykje om praktiske tilhøve som hindrar eller opnar for musikalsk samarbeid, men meir om identitetsbygging. Kvernberg (f. 1979) og Frøholm (f. 1978) er nå veletablerte folkemusikarar som i årevis har hatt tilgang til all verdas musikalske ressursar og turnert i inn- og utland. Dessutan: Byen Oslo har lenge vore den viktigaste møtestaden for yngre norske folkemusikarar. Likevel vel dei å nytta dei gamle fjella og fjordane som musikalske identitetsmarkørar.

Og det er tradisjonsmusikk for vanleg fele og hardingfele frå heimtraktene som er utgangspunktet for dei 16 spora på plata. Men alle er arrangerte – for det meste tostemt – av utøvarane, truleg med gode innspel frå samtidskomponisten Therese Birkelund Ulvo, som har produsert plata.

I det omfattande tekstheftet vert det lagt vekt på å presentere små soger og anekdotar om dei levande personane som ein gong laga eller spelte slåttane. Men dette er lesestoff, meir enn noko ein kan høyra seg til. Dei aller fleste slåttane er spenstige danseslåttar like mykje som konsert- eller platemusikk.

Dette er ein produksjon som kan opplevast med stort utbyte anten ein er oppteken av teknisk godt spel, historieformidling eller funksjonell dansemusikk.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.