Gamaldans

Anders Grøthes ensemble:

Danser i gammel stil av Anders Sørensen og Ole Rønning

Aksent

Mannen bak plateselskapet Aksent, Håvard Svendsrud, held trufast fram med å gje ut gull frå arkiva. Denne gongen gjeld det NRK-opptak frå 1986 og 1990 med gamaldansmusikk av komponistane Anders Sørensen (1821–1896) og Ole Rønning (1907–1993).

Musikken ein nyttar når det skal dansast vals, reinlendar og liknande, kan vera så mangt: frå solistisk felespel som stilmessig kan ligga nær opp til det eldre slåttespelet, via mindre grupper (der ein gjerne skil mellom melodi og komp), til større ensemble der stemmene er arrangerte og utskrivne på notar.

Det me får høyra på denne plata, er den typen gamaldansmusikk som grensar opp mot kunstmusikken. Trekkspelaren Anders Grøthe (f. 1944) står sentralt som solist i alle dei 19 komposisjonane han har arrangert for ensemble av ulik storleik (mellom anna med medlemer frå Kringkastingsorkesteret), men oftast medverkar to trekkspel, varierande tal strykarar, klarinett og gitar/bass. Jamvel vibrafon vert nytta av og til.

Arrangementa er svært gjennomarbeidde, og melodiføring/motstemmer vekslar elegant mellom trekkspela og strykarane. Som dansemusikk er dette funksjonelt og ukomplisert, men når det gjeld presisjonsnivå og detaljrikdom grensar dette mykje til den klassiske musikken. Sjølv om komposisjonane er henta frå kvart sitt hundreår, kan det ikkje seiast å vera nemneverdig musikalsk utvikling frå Sørensen til Rønning. Medan den musikken som får mest merksemd hjå musikkhistorieskrivarane er den som representerer noko nytt, er det typisk at dei mest folkekjære musikarane/komponistane ikkje nødvendigvis søker det nye, men tek vare på det gode og gamle.

Sigbjørn Apeland

Sigbjørn Apeland er musikar, musikkvitar og fast musikk-
meldar i dag og Tid.