Samtidsmusikk

Tøyen Fil og Klafferi:

Botanisk hage

Hanne Rekdal, fløyter og fagott; Kristine Tjøgersen, klarinettar; Eira Bjørnstad Foss, fiolin; Tove Margrethe Erikstad, cello
Aurora / Grappa

Kvartetten Tøyen Fil og Klafferi har sidan starten i 2010 tinga nærare 30 verk frå (hovudsakeleg) yngre, gjerne sjangeroverskridande komponistar. På denne plata spelar ensemblet seks verk av Hafdis Bjarnadóttir, Carola Bauckholt, Kristine Tjøgersen, Klaus Ellerhusen Holm, Ylva Lund Bergner og Lars Skoglund. Og på nettsida kan ein lesa at det alt er tinga seks nye verk frå andre komponistar.

Botanisk inspirasjon

På idéplanet er det den konkrete staden – Botanisk hage i Oslo – som er inspirasjon for verka. Det vakre og informative omslaget på vinylversjonen av utgjevinga inneheld detaljert informasjon om dette og er såleis ei påminning om at dei fysiske utgjevingane framleis er å føretrekka.

Medan mykje av den andre stadsspesifikke samtidsmusikken er improvisasjonsbasert, er denne musikken skapt med utgangspunkt i partitur og ideen om realisering av verka til komponistane.

Alternativ teknikk

Klangleg sett er musikken prega av alternative speleteknikkar, som ofte gjer det vanskeleg å vita kor lyden kjem frå når ein ikkje ser det. Dessutan er instrumentariet utvida med bruk av til dømes boksar, blad, steinar, sand, vatn, greiner og sugerøyr. Likevel kling dette umiskjenneleg som «ny musikk». Men medan store delar av samtidsmusikken som har utgangspunkt i dei institusjonaliserte delane av musikklivet (som musikkhøgskular og samtidsmusikkfestivalar) kan vera føreseielege og ofte keisame, er desse verka fulle av små detaljar som openberrar seg for kvar gong ein lyder på plata – på same måten som det er nye ting å oppdaga kvar gong ein går med opne sansar inn i ein botanisk hage.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.