Jazz

Kjetil Mulelid Trio

What You Thought Was Home

Kjetil Mulelid, piano, Bjørn Marius Hegge, bass og Andreas Skår Winther, trommer.
RUNE GRAMMOFON RCD2208

Medlemmene i denne trioen har mange jarn i elden. Dei har alle tre ei handfull prosjekt som dei aktivt tek del i, og dei respektive diskografiane byrjar å bli skikkeleg lange. Det er fort å gløyma at desse musikarane er +/- 30 år.

Åtte av dei ni låtane er komponerte av orkesterleiaren sjølv, medan «Bruremarsj» er signert Hegge. Trioen debuterte for to år sidan med Not Enough To Buy A House, og sjølv om slektskapen er tydeleg, er både komposisjonar, arrangement og lydbilete denne gongen meir profilerte. Trioen er i ferd med å skapa ein distinkt signatur. Framleis står det melodiøse i høgsetet, og gospelpåverknaden finn ein til dømes i «Homecoming» og nemnde «Bruremarsj», men What You Thought Was Home har ofte ein sær vri på melodikk, harmonikk og rytmikk som gjer denne utgjevinga meir fascinerande enn forgjengaren.

Den musikalske samtalen er stort sett i ein klassisk Bill Evans-tradisjon, men også her tek dei grep, som i den rytmisk bastante «Folk Song». Det ein sann svir å høyra korleis Mulelid og Skår Winther snor sine ytringar rundt ei fjellstø basslinje. Lydbiletet er svært «demokratisk» og tett på instrumenta, og i låten «Tales» svevar EST over vatna. Mulelid er ein flott improvisator som vågar å la linjene klinga ut. Ofte gjer han nett den vesle, men overraskande vrien på linja som gjer at han held lydaren i age.

Lars Mossefinn

Lars Mossefinn er lærar
ved Voss gymnas og fast jazzmeldar i Dag og Tid.