Rock

Nilüfer Yanya:

Feeling Lucky?

ATO Records

Eit sentralt tema på den London-baserte singer-songwriteren Nilüfer Yanyas debutalbum frå 2019, Miss Universe, var sjølvutvikling. I eit intervju med kringkastaren KEXP fortalde Yanya om balansegangen mellom å akseptere seg sjølv og å forbetre seg sjølv, og at to ting ho sjølv hadde lært seg å akseptere, var stemma si og måten ho speler gitar på. Det skal vi vere takksame for, for albumet bydde på ei rekkje framifrå låtar med finurleg produksjon og djuptloddande tekstar framførte med Yanyas unike, uttrykksfulle stemme.

Ho har halde fram med å utvikle uttrykket sitt. Låtane på den nye EP-en Feeling Lucky? verkar samtidige og nyskapande samstundes som inspirasjonen frå 80-talsrock av ymse slag er tydeleg. Rockeballaden «Same Damn Luck» startar forsiktig, men svulmar gradvis opp med stadig større harmoniar og tjukke The Cure-aktige gitareffektar og synthlydar, og «Day 7.5093» har djupe spor av The Polices reggae-inspirerte new wave – pluss eit bjølleaktig synthparti som, som seg hør og bør når det nærmar seg jul, bringar tankane til Wham.

I musikkvideoen til «Crash», ein låt prega av ein Pixies-aktig, hårfin balanse mellom det råe og det kjenslevare, opptrer artisten i rolla som elgitarspelande flyvertinne. Flykabinen av tape og aluminiumsfolie er ein effektiv, enkel og kompleks metafor, og når songen etter kvart tumlar nedover tonerekka og brått endrar karakter om att og om att, er det eit typisk døme på den intuitivt utspekulerte detaljrikdomen i virket til Nilüfer Yanya.

Rasmus Hungnes 

Rasmus Hungnes er musikar, kunstnar og fast musikkmeldar i Dag og Tid.