Folkemusikk

Knut Erik Sundquist og Nils Anders Mortensen:

En smuk aftensang

Contrasto

Når musikarar med klassisk bakgrunn vender seg mot folkemusikken, skjer det gjerne ved at dei spelar ulike komponistar sine arrangement av «folketonane». Og kjennarane av folkemusikk har vore ivrige med å påpeika at arrangert folkemusikk er noko anna en ekte folkemusikk.

Pianisten Nils Anders Mortensen står bak arrangementa på plata, og også han fører seg inn i ein tradisjon der folkemelodiane tener som råstoff for nye arrangement/komposisjonar.

Kontrollert

Men medan komponistar som omarbeider folkemusikk, gjerne har halde seg innan éin stil, til dømes «romantikk» eller «modernisme», sprikar Mortensens arrangement i mange retningar. Opningssporet «Havella» er ein temmeleg ordinær vals, «Det var seg den...» er utforma som ein heavyrockballade, «Penelopes klage» vert presentert som ein technolåt, og «Folketone fra Gratangen» kunne vore henta frå duoens store inspirasjonskjelde: Jan Johanson og Georg Riedels klassikar Jazz på svenska. Andersen og Sundquist har, ved sida av ein klassisk karriere, også sysla med jazz. Men her er det likevel den klassiske bakgrunnen som dominerer. Det merkar ein i eit veldig kontrollert spel, og mykje bruk av boge i høgt register på kontrabassen til Sundquist.

Godt utført

I det heile er dette godt utført – på godt og vondt. Spelet er prega av presisjon og overskot, men samstundes er det noko stivt over det. Bruken av stilistiske kontrastar og musikalsk humor er òg eit tviegga sverd: Av og til er det morosamt, men det signaliserer like mykje ironi og distanse.

Sjølv om dette prosjektet har nokre problematiske sider, representerer det likevel eit original og forfriskande tilskot til den arrangerte folkemusikken. Me har mange dyktige tradisjonelle utøvarar, og minst like mange som kombinerer folkemusikk med andre stilartar som rock, jazz og eksperimentell musikk. Men at klassisk skolerte musikarar arbeider på denne måten, er noko nytt.

Sigbjørn Apeland

Sigbjørn Apeland er musikar, musikkvitar og fast musikk-
meldar i Dag og Tid.