Internettkonsert

Robyn, Run The Jewels ofl.:

Adult Swim Festival

Adult Swim / YouTube

Ved sida av kringkasting av teiknefilm og annan mørk humor for vaksne har Adult Swim, vaksenavdelinga til TV-kanalen Cartoon Network, sidan 2018 arrangert ein årleg hybrid av fansamling og musikkfestival med konsertar, panelsamtalar og såkalla «watch parties». Medan dei to første utgåvene var i Los Angeles, gjekk årets festival av stabelen på internett førre helg.

Programmet dekte eit breitt spekter av sjangrar og uttrykksformer: Popartisten Robyn gjorde eit DJ-sett, Run The Jewels og Deftones presenterte nye musikkvideoar, og ein handfull artistar gjorde framsyningar med mellom anna ymse former for omgang med køyrety i og ute av trafikk. Konserten til alternativrockbandet Algiers gjekk føre seg framom ein blåskjerm og eit openbert ikkje-eksisterande publikum, som inkluderte akrobatar og hestar, og fungerte som ein likefram kommentar til isolasjonstida vi lever i.

Det er noko spesielt ved å sjå korleis musikarar trakterer instrumenta sine i den augneblinken musikken blir til, og kan hende er dermed dei mindre gimmickorienterte og meir tradisjonelt konsertaktige delane av festivalen mest relevante nett no. Slike var det heldigvis mange av. Nokre høgdepunkt var elektronikaartisten Loraine James’ virtuose oppbygging av hakkete trommemaskinrytmar og forvrengde samplingar, death metal-bandet Blood Incantations konsert med den avlidne filosofen Terence McKenna på spoken word-gjestevokal, og krautrock-jam frå øvingslokalet gitaristen Nate Mercereau med band. Det heile ligg arkivert på Adult Swims YouTube-kanal, og gratis er det òg.

Rasmus Hungnes

Rasmus Hungnes er trommeslagar, kunstnar og fast musikkmeldar i Dag og Tid.