Jazz / samtids-
musikk

Voice & Strings & Timpani:

Voice & Strings & Timpani

 Mari Kvien Brunvoll, vokal og elektronikk; Eva Pfitzenmaier, vokal, tangentinstrument og fløyte; Stein Urheim, gitar, elektronikk og langeleik; Stephan Meidell, gitar, elektronikk og synth; Kim Åge Furuhaug, trommer og perkusjon; Øyvind Hegg-Lunde, trommer, perkusjon og synth. Hubro

Voice & Strings & Timpani var eit tingingsverk til Nattjazz i 2016. Duoen Hegg-Lunde og Meidell, som spelar saman i Erlend Apneseth trio, Building Instruments og duoen Strings & Timpani, har skrive all musikken og inviterte gode vener og kollegaer til denne samtidsmusikalske sommardansen. Her har det vore ei heidundrande idémyldring, og heldigvis er ikkje tankekartet sirleg rydda og strukturert. Noko av poenget har vel vore å skapa ei hummar-og-kanari-kjensle?

 Aller best læt det likevel når duoen er i det minimalistiske hjørnet, som i «Talk Tick Talk» og «Cashmere». Det er retning og driv når dei er på sitt mest flytande og tilslørande. Sjølv om musikken er gjennomkomponert og -arrangert, er ikkje regien strammare enn at særmerkte instrumentalistar som Stein Urheim og Mari Kvien Brunvoll på diskré vis fargar innspelinga. Jørgen Træen har saman med komponistduoen skapt ein rik og mektig klang som likevel maktar å ta vare på nyansane og dynamikken i musikken. Ein vert oppstemt av slik musikk!

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.