Rock

Basia Bulat:

Are You in Love?

Secret City / Playground

Det er like greitt å gå rett på sak og stille dei store spørsmåla frå første stund, er det ikkje?

Slik er i alle fall taktikken på Basia Bulats nye album, Are You in Love?, som dundrar i gang med eit tittelspor som er akkurat så svimlande og rett fram som det bør vere.

Er du forelska? Spørsmålet er ikkje til å kimse av, anten ein stiller det til nokon andre eller til seg sjølv. Det er ikkje for ingenting at kjærleik er popsongens største tema, for lidenskap og tvil er pålitelege kjelder til indre og ytre dramatikk, og då svulmar det fort i både ord og tonar.

Herleg energi

Som eg var inne på i omtalar på desse sidene då dei kom ut, er dei to førre platene frå Bulat, Tall Tall Shadow (2013) og Good Advice (2016), begge fulle av songar om konfliktfull kjærleik, ofte kjærleik av slaget ein til slutt tenkjer at ein kunne klart seg forutan. Men fleire av desse låtane smittar også med ein herleg energi – melodiøs poprock av slaget som løftar stemninga. Då Basia Bulat spelte på ein sommarfestival for fire år sidan og henta fram «Tall Tall Shadow», dansa folk framføre scenen, men ho kjende seg likevel kalla til å melde at ho hadde det betre no: «Eg er lukkeleg no», sa ho. «Det er alltid greitt når ein kan seie til seg sjølv at den tida er over.»

Dermed snakka ho rett frå ei livsendring som i same stund vel utfalda seg, for saman med henne på scenen stod multiinstrumentalisten Andrew Woods, og sanneleg gifta ikkje dei to seg i fjor. Are You in Love? er ein medrivande poprapport frå nokon som er hovudstups midt oppi det: Albumet er ikkje ei banal feiring av kjærleikstriumf, men nærmar seg snarare intensiteten som følgjer med det å sleppe taket og satse alt.

Flott popvokalist

Det høyrer med til historia at Bulat måtte ta eit års pause frå dette albumet for å finne den rette vegen inn i materialet, og at ho fekk med seg musikarane til eit studio i Mojave-ørkenen for å vere på rett plass for å yte det rettferd – eit landskap som ikkje manglar soloppgangar og solnedgangar av ein art som passar temperamentet på Are You in Love?.

Jim James (My Morning Jacket) er atter med som produsent, som på Good Advice, og dei som likte det albumet, kan trygt prøve seg på Are You In Love?. Bulat er god på popmusikk som går i møte med dei store kjenslene, som i albumets siste og på alle måtar storslegne låt, titulert «Love Is at the End of the World». «You fall apart when you fall into it», syng Bulat der, og går til høgdene med si eiga røyst, akkurat der det trengst – ei påminning om kor flott ein popvokalist ho er.

Øyvind Vågnes

Øyvind Vågnes er forfattar og fast musikkskribent i Dag og Tid.