Jazz

Exoterm:

Exits Into A Corridor

Kristoffer Berre Alberts, Nels Cline, gitarar, Rune Nergaard, bass og Jim Black, trommer og elektronikk.HUBRO HUBROCD2618

Honnør til Rune Nergaard for å ha samla denne kvartetten nokre dagar i eit New York-studio. Gitaristen Nels Cline er kjend for dei fleste frå bandet Wilco, og Jim Black er ein mykje nytta trommeslagar i amerikansk og europeisk avantgardejazz. Cline og Black har samarbeidd i trio med saksofonisten Tim Berne. Nergaard og Alberts har spelt saman i ulike konstellasjonar heilt attende til studiedagane ved konservatoriet i Trondheim.

Det er gjerne slik at Nergaard og Alberts har fått høve til å spela med favorittmusikarane sine, men dette er i aller høgste grad eit likeverdig musikalsk samarbeid. All musikken er komponert av Nergaard, men nokre av låtane er berre skisser som gjev ei retning. Eit par låtar er komposisjonar i meir tradisjonell forstand. I desse Vy- og OsloMet-tider skal dei ha ros for å gje bandet eit dekkjande namn. Her kjem den eine energiutladinga etter den andre enten i tungrockinnpakking eller som del av eit støyuttrykk.

Musikken kombinerer ei spel-for-livet-tilnærming med meditative strekk, der bandet skapar skiftande, spanande klangflater. Fleire av låtane har dette tosidige preget. Aller best kjem dette fram i avslutningssporet «Manufacturing A Smile». Det Alberts og Cline gjer her, er samspel frå øvste hylle. I «Forest Mist – Night» er det Cline og Black som står for telepatien. I denne låten er Alberts på sitt mest «aylerske». Nergaard er den solid botnplanken heile vegen, og så gjev han oss den einaste sviska på plata: «Moves Away from The Door». Vonleg vil det følgja fleire eksoterme reaksjonar.

Lars Mossefinn

Lars Mossefinn er lærar ved Voss gymnas og fast jazzmeldar

i Dag og Tid.