Elektronisk
musikk

Blank Banshee:

Metamor­phosis

Hologram Bay

Den kanadiske artisten Patrick Driscoll, betre kjend som Blank Banshee, er blant dei mest kjende produsentane innan vaporwave. Han opererer med ein stil som gjerne blir kalla vaportrap, ein kombinasjon av vaporwave, ein sjanger som oppstod i internettkulturen rundt 2010, og trap, ein undersjanger av hiphop og dubstep som er spekka med umiskjenneleg suggererande, dundrande basstrommer.

Samanlikna med hans tre tidligare album, 0, 1 og Mega, som alle med god grunn kan reknast som klassikarar innan vaporwave, er EP-en Metamorphosis meir meditativ og ambientaktig i karakteren. Her er det mindre openberr sampling av nostalgisk populærkultur på gang – i Blank Banshees produksjon er snuttar lånte frå kjelder som Windows 95-oppstarten og teiknefilmar som Simpsons og Akira ofte lett gjenkjennelege – og låtane er korte.

Eller, alternativt, den eine låta er lang. Faktisk finst den digitale versjonen av Metamorphosis i to utgåver: ei som er delt opp i femten korte spor, og ei som berre består av eitt einaste enkeltspor på om lag atten minutt. Sidan digitale apparat ofte legg inn ein liten pause mellom spora, er den samanhengande utgåva tilrådeleg. Metamorphosis er nemleg eit eklektisk og skiftande stykke musikk, tydeleg inspirert av new age-synthmusikk, ymse folkemusikk frå både aust og vest, gamaldags dataspelmusikk og elektronisk dansemusikk av mange slag, som trass i den vide stilartssamanstillinga går i eitt på saumlaust, flytande, hugnadsgivande vis.

Rasmus Hungnes

Rasmus Hungnes er musikar og fast musikkmeldar i Dag og Tid.