Ein ekte duo

To av Robert Schumanns (1810–1856) store songsyklusar er det den tyske barytonen Matthias Goerne og Leif Ove Andsnes gjev oss her: Liederkreis, op. 24, til tekstar av Heinrich Heine og Kernerlieder, op. 35, til tekstar av Justinus Kerner, begge komponerte i 1840. Denne røynde duoen tolkar Schumanns eksplosive kjensleunivers med uvanleg teknisk akkuratesse og overtydande innleving. Og ein duo er dei verkeleg – å redusera Andsnes’ rolle til berre akkompagnatør, blir feil, for det kommenterande og nyanserande klaverspelet hans er så mykje meir.