Jazz

Wako:

Wako

Martin Myhre Olsen, saksofonar; Kjetil André Mulelid, piano; Bárdur Reinert Poulsen, bass; Simon Olderskog Albertsen, trommer; Kaja Constance Rogers, fiolin; Isa Caroline Holmesland, bratsj; Kaja Pettersen, cello (1,8,13); Kyrre Laastad, synth (3); Rob Waring, vibrafon (4,9,12); Espen Reinertsen, saksofon, synth og elektronikk (6); Arve Henriksen, trompet, synth og sampling (7); Jonas Kullhammar, Varitone-saksofon (9); Adrian Løseth Waade, fiolin (9,13); Sissel Vera Pettersen, saksofon og vokal (10). ØRA FONOGRAM OF157

 Med den fjerde plata si, som kjem ut 21. februar, kort og godt kalla Wako, har kvartetten heva arrangørambisjonane og brukt studioet for mykje av det det kan vera verdt. I tillegg har dei invitert ti musikarar som gjester, det vil seia strykarane og Henriksen, Kullhammar og Reinertsen, som har gjort sine pålegg i etterkant. Likevel er dette lett attkjenneleg Wako-musikk ført i pennen av Olsen og Mulelid. Attkjenneleg i alt sitt kaotiske mangfald, må ein leggja til.

 Wako gjennomfører etter intensjonane. Mange av arrangementa gjev musikken ein tilleggsdimensjon, og dei lagar heller ikkje sjenerande hinder for improvisatorisk utfalding sjølv om måten å samarbeida på ikkje alltid opnar for ein ynskjeleg (?) interaksjon. Det er likevel overraskande kor forfriskande hand-i-hanske samarbeidet med både Henriksen og Kullhammar fungerer. «Grown-up Life» er elles eitt av høgdepunkta på plata, og det kjem i stor grad av medverknaden til Waring og Waade.

 Nemnast må også samarbeidet med stryketrioen på tre låtar. Komposisjonane til Olsen kler strykearrangementa, og Rogers, Holmesland og Pettersen gjer fine pålegg, men her er det samstundes meir å henta. Kvartetten er spanande å følgja, og utgjevinga Wako har ikkje redusert interessa.  

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.