Wilco var nett på ein aldri så liten noregsturné, rett og slett, med klubbkonsertar i Trondheim, Stavanger, Bergen og Oslo. Bandet spelte raust nærare tretti låtar kvar kveld, inkludert smakebitar frå den ferske (og på det tidspunktet enno ikkje utgjevne) Ode to Joy, inkludert «Love is Everywhere», som vel må vere ein av årets finaste låtar.

Nye og gamle lyttarar bør få med seg Wilcovered, som rett og slett er ei av desse CD-platene som er hefta på eit britisk musikkmagasin som gratis bonus (ofte med varierande kvalitet). På disken som følgjer novemberutgåva av Uncut, har 17 artistar, mellom dei folk som Courtney Barnett, Whitney, Kurt Vile, Low, Ryley Walker, Sharon Van Etten, og The Handsome Family, tolka Wilco, på invitasjon frå bandet sjølv.

Som både Jeff Tweedy og Uncut poengterer, viser prosjektet med alle sine forgreiningar fram korleis eit miljø og til og med ein heil kultur kan omgi og verte samanfletta med eit band på eit vis som framhever det kollektive, og nye og gamle venskap. Min favorittversjon? Det treng eg eit par veker til på å bestemme meg for.

Øyvind Vågnes