Det hender eg tenkjer på novemberkvelden i 1993 då eg høyrde Van Morrison for første gong, i Oslo, dit han tok turen i kjølvatnet av bluesalbumet Too Long In Exile, som kom ut sommaren det året. Det var ein storarta kveld, ikkje minst var den inspirerte klassikarvandringa minneverdig, anten Morrison tolka Sam Cooke eller Ray Charles.

Nesten eit kvart hundreår seinare er Roll With The Punches her, eit album som finn Morrison i meir eller mindre same lune som den gongen – Georgie Fame er på plass, og jammen dukkar både «Stormy Monday» og «Lonely Avenue» snart nok opp, slik dei gjorde det den kvelden på Sentrum Scene.

Fem nye sjølvskrivne songar er det plass til, men dei bleiknar litt mellom klassikarar av folk som Mose Allison, Sister Rosetta Sharpe og Bo Diddley. Roll With The Punches er ei triveleg plate, og har du planar om ein tur til Storbritannia i november, er det ein miniturné på gang.

Øyvind Vågnes