Mellom vårens markante boksutgivingar finn vi Recording Is the Trip: The Karen Dalton Archives Box Set, som løftar fram artisten Bob Dylan kalla sin favorittsongar i memoarboka Chronicles (2004). Dalton var sentral i musikkmiljøet i Greenwich Village i New York tidleg i 1960-åra, før ho forsvann derfrå, og frå musikkverda, for ikkje å komme tilbake.

Ho laga berre to plater, It’s So Hard to Tell Who’s Going to Love You the Best (1969) og In My Own Time (1971). Dei inneheldt ikkje noko ho sjølv skreiv, men skreiv gjorde ho, noko Rembering Mountains: Unheard Songs by Karen Dalton (2015) viser til fulle, med tolkingar av Sharon Van Etten, Julia Holter og Lucinda Williams, for å nemne nokre.

Det har dukka opp innspelingar med ujamne mellomrom opp gjennom åra, men aldri så systematisk og omfattande som med denne nye boksen, som inneheld konsertopptak, heimeopptak, ein DVD og eit flott hefte med nedteikningar og fotografi frå Daltons skuffer og skap. Alt som skal til for å fordjupe seg i ei røyst og ein musikk som var, og er, unik, 27 år etter at Dalton gjekk bort i ein alder av 55 år.

Øyvind Vågnes