Somme lesarar vil vel hugse plata den svært så produktive Juliana Hatfield gav ut i 2018, med songar av ingen ringare enn Olivia Newton-John, og no følgjer ho på eit vis opp med Juliana Hatfield Sings The Police (American Laundromat Records).

Eg skal vedgå at eg synest slike prosjekt er artige – det er eit lite eventyr å finne ut kva som kan bu i ein song, og kva hamskifte han kan gå gjennom i hendene på ein snerten og kløktig fortolkar. Hatfield har saktens vist seg å vere ein slik. Ikkje minst er låtvalet hennar interessant. Nyleg fortalde ho ei Boston-avis at ho meiner at fleire av songane til The Police grip rett inn i vår eiga samtid, med «Rehumanize Yourself» som døme. Hadde dette coveralbumet vore ein rein hitparade, ville det ha vore langt mindre interessant.

Hatfield gjer det meste sjølv på albumet. Ikkje berre tilfører ho songane mykje med gitarspelet, ho syng og spelar keyboard på alle tolv spora og tek seg av trommene og bassen på halvparten.

Øyvind Vågnes