Mykje godt har komme frå Studio Ghibli opp gjennom tidene – fleire lesarar vil kjenne animasjonsfilmane som etter kvart har forma fleire generasjonar av sjåarar, som Min nabo Tororo (1988), Kikis budservice (1989), og Chihiro og heksene (2001), for å nemne tre klassikarar regissert av Hayao Miyazaki. No dukkar denne filmskatten dosevis opp på Netflix, og det gjekk ikkje mange dagane før vi henta fram forteljinga om Totoro i stova, for den verkar det som om ingen av oss er for unge, eller vert for gamle, til.

Fleire av Studio Ghiblis filmar er også utstyrte med utsøkte lydspor, og no har filmkomponist Joe Hisaishi samla eit fint utval på Dream Songs: The Essential Joe Hisaishi (Decca Gold). Tolkingar og versjonar har florert i årevis, også frå våre stovehøgtalarar, men denne nye utgivinga finn balansen og er sobert kvalitetssikra av Hisaishi sjølv. Heile 28 spor har det vorte plass til, med melodiar frå store delar av studioets produksjon – ein veritabel dokumentasjon av Hisaishis kraft som filmkomponist.

Øyvind Vågnes