Det bør sjølvsagt feirast at plateetiketten Hubro, eit herleg tilskot i det norske musikklandskapet, fyller ti år. Det har vore ein travel haust med fleire utgivingar, så vi får ta nett det som eit teikn på at føretaket har ei lang framtid, og at den eklektiske katalogen, som er like sterkt kjenneteikna av integritet som av variasjon, held fram med å vekse.

Denne helga er det jubileumskonsertar både i hovudstaden og i Bergen, der framifrå Hubro-profilar står på scenen:

I kveld dukkar både Mats Eilertsen og herlege Skarbø Skulekorps opp på Victoria, og i morgon stiller Stein Urheim opp på Blå, der han vert følgd av Erlend Apneseth med trioen sin forsterka av Frode Haltli. Er du på andre sida av fjella, er det heller ingen grunn til fortviling. Søndag finn både Urheim og gjengen i Skarbø Skulekorps vegen til Landmark i Bergen.

De som ikkje kan komme på noko av dette, skaff dykk heller siste tilskot til Hubro-katalogen, nemleg Umbra, det nye albumet frå trioen Lumen Drones, der Nils Økland (feler), Per Steinar Lie (gitarar) og Ørjan Haaland (trommer) lagar musikk i alle fall ikkje eg skal prøve å setje ei sjangernemning på. Det einaste eg veit, er at eg ikkje klarar å slutte å lytte til plata – og det er som kjent det viktigaste.

Øyvind Vågnes