Det ligg kjærleik bak arbeidet Dhani og Olivia Harrison, son til og enka etter George Harrison, har gjort med All Things Must Pass, trippelalbumet den då ferske «eksbeatlen» gav ut hausten 1970, som no er ute igjen i opp til fleire spesialutgåver. Med materialet som no er tilgjengeleg, er ein veritabel bauta over plata og alt rundt utgivinga reist, inkludert meir enn førti spor som tidlegare ikkje har vore utgitte. Olivia Harrison har sett saman ei heil lita bok, og Dhani Harrison har fått med seg Paul Hicks til å lage ein ny, rik lydmiks. Plata har vore nyutgitt før, men dette vil verte ståande som den definitive utgåva.

Det er saktens givande å fordjupe seg i All Things Must Pass. Tidleg på nyåret 1970 inviterte George Harrison produsent Phil Spector heim til seg, og han spelte ei omfattande mengd songar til han, gammalt og nytt. På våren gjekk innspelinga i gong for alvor i Abbey Road Studios. 

At albumet høyrer til mellom dei aller beste laga av ein eksbeatle, kan det ikkje vere tvil om. Store låtar som «I’d Have You Anytime» (skriven med Dylan), gospelinspirerte «My Sweet Lord,» «Behind That Locked Door» og ikkje minst tittelsporet står seg himla godt eit halvt hundreår seinare. Det går det an å finne ut sjølv utan dette storslegne kompendiet.

Øyvind Vågnes