Dei kan ha råd til å ta med seg New Zealand Symphony Orchestra på turné, Jermaine Clement og Bret McKenzie i Flight of the Conchords, i alle fall i utgåva av orkesteret som vi høyrer på Live in London – for det har berre éin musikar.

Det var ein svært god idé å lage konsertplate for bandet som har kalla seg «New Zealand’s fourth most popular guitar-based digi-bongo acapella-rap-funk-comedy folk duo». Nokre av songane vil vere kjende for lesarar som følgde med på HBO-serien Flight of the Conchords, som gjekk over to sesongar på totalt 22 episodar i 2009, men her er det også mykje nytt å glede seg over, ikkje minst om ein inkluderer småpraten mellom songane.

Der HBO-serien dreidde seg om dei nokså formidable hindringane duoen møter på når dei skal slå gjennom i New York, handla radioserien på BBC Radio 2, send i 2005 med Rob Brydon som forteljar, om kampen om merksemd i London. Kanskje kan ein seie at ringen er slutta når bandet forlèt sin eigen radiofiksjon og fyller konsertsalar i den heilt verkelege utgåva av den engelske hovudstaden. Live in London finst som konsertspesial på HBO, men toler godt overgangen til plate – for desse karane stod på scenen og var å høyre i etermediet lenge før dei dukka opp på skjermen.

Øyvind Vågnes