Måndag fyller Bruce Frederick Joseph Springsteen saktens 70 år. Tenk det! Det nærmar seg raskt eit halvt hundreår sidan platedebuten i 1973, men det er få teikn til at fyren som fekk tilnamnet «The Boss», skal pensjonere seg.

Det har gått mange år sidan eg har lytta så mykje til ei ny Springsteen-plate som eg gjorde til årets vitale Western Stars, og difor var det eigentleg godt nytt då det vart kjent at Springsteen Incorporated har laga ein konsertfilm som følgjer albumet. Regien er det (som med Springsteen on Broadway) Thom Zimny som står for, saman med (for første gong) Springsteen sjølv.

Filmen Western Stars hadde verdspremiere på filmfestivalen i Toronto for vel ei veke sidan og er etter rapportane å døme umisteleg for lyttarskaren. Her vert songane på plata framførte med orkester i ein gammal låve for eit lite publikum, innramma av forteljingar, små vignettfilmar og arkivmateriale ingen har sett før. Og heilt til slutt, står det å lese i omtalar av Western Stars, får vi ein versjon av Glen Campbells «Rhinestone Cowboy». Det kan neppe gå heilt gale.

Øyvind Vågnes