Julemusikk

Helga Johanne Størdal og Trio Serafin:

Julefred over jorda

Lød

Det ser ut til å vera ein umetteleg marknad for motstandslaus og lettbeint julemusikk. Denne plata kan trygt kategoriserast som ein motsetnad til kommersiell julemusak.

Den klassiske sopranen Helga Johanne Størdal har funne fram 13 julesongar frå ulike stader i verda, omsett fleire av dei sjølv og fått dei kledde i arrangement av komponisten Ewa Serafin. Utgangspunktet er folkelege juleviser med kristent tekstinnhald.

Klassisk preg

Det musikalske uttrykket har eit tydeleg klassisk preg. Stemma til Størdal er slank, men kontrollert, og sjølv om ho prøver å nærma seg ein slags folkemusikkstil ved å legga til ein del ornament til melodiane, er likevel dette langt frå det dei fleste vil rekna som folkemusikk. Og det er når ho held seg til eit klassisk songideal at formidlinga verkar mest truverdig. Også arrangementa for fiolin, cello og klaver er gjennomkomponerte i ein klassisk bruksmusikalsk stil som ikkje er så lett å plassera, men det er i alle fall tydelege spor av impresjonisme og varsame lån av populærmusikalske element.

Politisk tolking

Tekstleg er tematikken ikkje berre knytt til idyllen rundt det vesle barnet i stallen, men like mykje rundt uskuldige menneske som er på flukt frå vald og krig. Tittelen Julefred over jorda vert såleis meir enn ei julekortaktig stemning, og han vert gjeven ei politisk tolking. Også dei musikalske arrangementa fylgjer opp denne alvorsame tilnærminga til jula, og ofte er dei såpass intense at dei verkar forstyrrande.

Songane er solid framførte, og det er rosverdig å trekka fram og omsetja – for dei fleste av oss – ukjende julesongar. Men plata er krevjande og heilt ueigna som bakgrunnsmusikk. Den som tek seg tid til å lyda nøye, kan finna mykje oppbyggjeleg her.

Sigbjørn Apeland

Sigbjørn Apeland er musikar, musikkvitar og fast musikkmeldar i Dag og Tid.