🎧 Orgelmeisteren frå Nürnberg
Johann Pachelbel komponerte meir enn berre den evinnelege kanonen.
Johannes Creutzburg-orgelet (1735) i St. Cyriakus-kyrkja i Duderstadt er eitt av instrumenta på CD-en.
Foto: Stefan Buchard
Lytt til artikkelen:
CD
Johann Pachelbel:
Complete Organ Works III
James David Christie, Michael Belotti og Christian Schmitt, orgel. CPO 2019
Talsymbolikken ville nok dei bibellærde i barokken nikka nøgd til: Det tredje albumet i plateselskapet CPOs Pachelbel-serie er eit trippelalbum der tre organistar spelar i tre kyrkjer i tre ulike land. På originalinstrument frå byrjinga av 1700-talet tek dei her føre seg kvar si verkform: fyrst koralpartitaar, altså variasjonar over kjende salmemelodiar, så pasjonsmusikk, og til sist ulike former for koralforspel.
Kven var så denne barokkomponisten, som me i dag vanlegvis assosierer med berre eitt spesifikt verk?
Bach-familien
Johann Pachelbel (1653–1706) frå Nürnberg høyrer til dei viktigaste meistrane i den sørtyske orgeltradisjonen. I løpet av livet kledde han stillingar ved mange viktige kyrkjer i tyske og austerrikske byar, mellom anna i Eisenach, J.S. Bachs heimby i Thüringen, der han var kollega med far til Bach, Johann Ambrosius. Bach sjølv var for ung til å få orgelundervisning av Pachelbel, slik den eldre broren Johann Christoph fekk. Likevel skulle orgelmusikken hans bli viktig for Bachs utvikling som komponist.
Medan Pachelbel i samtida var vidgjeten som orgelkomponist, er det i dag altså underleg nok kammermusikkstykket me kallar «Pachelbels kanon», som er blitt varemerket hans. I røynda heiter det Canone per 3 Violini e Basso. (Eit utal meir eller mindre vulgære moderne arrangement finst. Men den som ynskjer å høyra ei fin, historisk korrekt framføring, lyt skaffa seg albumet Canon & Gigue, som blei spelt inn av ensemblet Musica Antiqua Köln i 1983 og sidan er kome i mange opplag.)
Symbalar
Korleis er så tolkingane på den nye plata? Med Toccata i C-dur gjev amerikanaren James David Christie oss orgelbrus av det mektige slaget. Det er bylgjande driv over spelet hans, med briljante triller som slyngjer frasane framover. Pasjonsmusikken er det tyskaren Michael Belotti som tek seg av, og mest melankolsk er Ciaccona i a-moll. Til liks med den vidgjetne kanonen består denne av ei stutt bassline som går på «repeat», medan det stadig kjem nye variasjonar i overstemmene. Eg tykkjer Belotti kunne ha spelt ciacconaen med større rytmisk stringens, for utan stringens blir det ingen «groove» i slike variasjonsstykke.
Christian Schmitt, også han tyskar, framfører mellom anna koralforspelet til «Wie schön leuchtet der Morgenstern» (eller «Ei morgonstjerne klår og fin», som salmen heiter i Elias Blix’ omsetjing). Fraseringa hans er sofistikert; særleg lyt den fintmerkande fingerartikulasjonen hans framhevast. Slutten av dette koralforspelet byr elles på ei hyggjeleg overrasking: Den sylvklåre raslinga av ørsmå symbalar (metallplater), eit effektregister som er typisk for store barokkorgel av slaget albumet presenterer.
Sjur Haga Bringeland
Sjur Haga Bringeland er
musikar, musikkvitar og
fast musikkmeldar i Dag og Tid.
Er du abonnent? Logg på her for å lese vidare.
Digital tilgang til DAG OG TID – heilt utan binding
Prøv ein månad for kr 49.
Deretter kr 199 per månad. Stopp når du vil.
Lytt til artikkelen:
CD
Johann Pachelbel:
Complete Organ Works III
James David Christie, Michael Belotti og Christian Schmitt, orgel. CPO 2019
Talsymbolikken ville nok dei bibellærde i barokken nikka nøgd til: Det tredje albumet i plateselskapet CPOs Pachelbel-serie er eit trippelalbum der tre organistar spelar i tre kyrkjer i tre ulike land. På originalinstrument frå byrjinga av 1700-talet tek dei her føre seg kvar si verkform: fyrst koralpartitaar, altså variasjonar over kjende salmemelodiar, så pasjonsmusikk, og til sist ulike former for koralforspel.
Kven var så denne barokkomponisten, som me i dag vanlegvis assosierer med berre eitt spesifikt verk?
Bach-familien
Johann Pachelbel (1653–1706) frå Nürnberg høyrer til dei viktigaste meistrane i den sørtyske orgeltradisjonen. I løpet av livet kledde han stillingar ved mange viktige kyrkjer i tyske og austerrikske byar, mellom anna i Eisenach, J.S. Bachs heimby i Thüringen, der han var kollega med far til Bach, Johann Ambrosius. Bach sjølv var for ung til å få orgelundervisning av Pachelbel, slik den eldre broren Johann Christoph fekk. Likevel skulle orgelmusikken hans bli viktig for Bachs utvikling som komponist.
Medan Pachelbel i samtida var vidgjeten som orgelkomponist, er det i dag altså underleg nok kammermusikkstykket me kallar «Pachelbels kanon», som er blitt varemerket hans. I røynda heiter det Canone per 3 Violini e Basso. (Eit utal meir eller mindre vulgære moderne arrangement finst. Men den som ynskjer å høyra ei fin, historisk korrekt framføring, lyt skaffa seg albumet Canon & Gigue, som blei spelt inn av ensemblet Musica Antiqua Köln i 1983 og sidan er kome i mange opplag.)
Symbalar
Korleis er så tolkingane på den nye plata? Med Toccata i C-dur gjev amerikanaren James David Christie oss orgelbrus av det mektige slaget. Det er bylgjande driv over spelet hans, med briljante triller som slyngjer frasane framover. Pasjonsmusikken er det tyskaren Michael Belotti som tek seg av, og mest melankolsk er Ciaccona i a-moll. Til liks med den vidgjetne kanonen består denne av ei stutt bassline som går på «repeat», medan det stadig kjem nye variasjonar i overstemmene. Eg tykkjer Belotti kunne ha spelt ciacconaen med større rytmisk stringens, for utan stringens blir det ingen «groove» i slike variasjonsstykke.
Christian Schmitt, også han tyskar, framfører mellom anna koralforspelet til «Wie schön leuchtet der Morgenstern» (eller «Ei morgonstjerne klår og fin», som salmen heiter i Elias Blix’ omsetjing). Fraseringa hans er sofistikert; særleg lyt den fintmerkande fingerartikulasjonen hans framhevast. Slutten av dette koralforspelet byr elles på ei hyggjeleg overrasking: Den sylvklåre raslinga av ørsmå symbalar (metallplater), eit effektregister som er typisk for store barokkorgel av slaget albumet presenterer.
Sjur Haga Bringeland
Sjur Haga Bringeland er
musikar, musikkvitar og
fast musikkmeldar i Dag og Tid.
Fleire artiklar
Foto: Seth Wenig / AP / NTB
Eit teikn på frustrasjon
Korkje Trump eller Biden har i røynda full kontroll på auke og fall i inflasjon eller kriminalitet.
Else Hagen: «Familie» (1950), olje på lerret. Rolf E. Stenersens samling / Munchmuseet.
Etterlysing og turné
Else Hagen er i dag eit ukjent namn for mange, men det er i endring.
Anders Folkestad og Torbjørn Ryssevik meiner det er nødvendig å styrke den vidaregåande skulen si studieførebuande rolle.
Gorm Kallestad / NTB
Studieopptak og skulifisering
Statsråden gjer rett i å avvise opptaksprøver som hovudveg til høgare utdanning.
Stig Amdam og Ragnhild Gudbrandsen spelar hovudrollene i stykket av August Strindberg.
Foto: Magnus Skrede / Den Nationale Scene
Krigen mellom kjønna
Dødsdansen er eit ekteskapsdrama der komikken får for stor plass, men spelestilane utfordrar kvarandre på interessant vis.
Nana rise-Lynum er redaktør i Norsk Barneblad.
Foto: Per Anders Todal
Å gi barn det dei ikkje veit at dei vil ha
Norsk Barneblad vart skipa i 1887 og har kome ut kvart år sidan. Sist helg fekk Nana Rise-Lynum Målprisen frå Noregs Mållag for innsatsen som redaktør.