Grøss og gru

Lars Mæhle:

Død eller levande

Samlaget

Lars Mæhle er også aktuell med ein lettlesen grøssar for ungdom. Død eller levande er ei av tre utgjevingar i serien Grøss og gru, så langt.

I denne boka møter vi tvillingane Simon og Katrin, som kan kome i kontakt med dei døde. Ein underleg mann bankar på døra og ber om hjelp til å finne dotter si. Ho forsvann for over 30 år sidan. Frå brakkene nede i Bekkadalen høyrer dei gjenferdet etter ein tysk soldat spele pianomusikk. Tvillingane veit at det betyr fare.

Skodde, vind og regn. Eit mørkt arkiv, ei gamal kro, ei krengande hengebru... Lars Mæhle malar fram eit miljø og ei stemning som er skummel i seg sjølv, og som gjev assosiasjonar til både filmar og forteljingar i skrekksjangeren.

Kartet på innsidepermen kjenner lesarane frå fantasybøkene, det gjer at teksten klarer seg med færre skildringar. At teksten er full av hint til annan litteratur, historie, film og musikk, er også med på å kompensere for få ord og korte setningar.

Den enkle forma gjev lesaren plass til å skape si eiga, skumle historie. Teksten minner om noko ein har sett, høyrt eller lest før, og fantasien får spelerom mellom linjene. Slikt kan ein bli skikkeleg skremd av.

Janne Karin Støylen