Biletbok

Hilde Hodnefjeld:

Lykke og ulykken

Cappelen Damm

Pappa trur på lukka, men mest på ulukka. Denne må Lykke passe seg for. Ho må stå opp med rett fot, ikkje gå under stigar, halde seg unna svarte kattar og sjå opp for edderkoppar.

Lykke gjer så godt ho kan, men ho lukkast ikkje alltid.

– No treng vi eit stjerneskot, seier pappa då.

Byen er for lys, stjerneskota viser ikkje i blokka der dei bur. Firkløverane har heller ingen stad å vekse. Miljøproblema er eit sidetema i forteljinga.

Stor variasjon i perspektiv, vinklar og kontrastar understrekar både handlinga og kjenslene.

Pappa har det vanskeleg og må reise bort. Lykke trur han skal finne gullet i enden av regnbogen.

Nokre oppslag har mykje tekst, andre mindre. Lita skrift og eit krevjande tema peikar mot at dette er ei bok som bør lesast høgt for eit barn av ein vaksen.

Fleire utfordringar ventar den vaksne høgtlesaren. Ein overtruisk far i ei moderne blokk er eit svakt plot, dessutan er ikkje overtru av denne typen ein del av barnelærdomen lenger.

Boka kan likevel lesast som ein vegvisar ut av det vanskelege. Forstått på denne måten er ho både vakker og vellukka.

Janne Karin Støylen