Trøndelag Teater

Lukas BÄrfuss:

Parsifal

Omsett av Øyvind Berg
Regi: Mina Salehpour
Scenografi: Andrea Wagner
Kostyme: Maria Andershi
Komponist: Sandro Tajouri
Lysdesign: Eivind Myren

Det er openbert tysk teater som er toneangjevande i nordeuropeisk scenekunst for tida. Impulsane frå Tyskland og gjesteinstruktørane derifrå har gjeve mange nye og overraskande skråblikk på teaterklassikarane her i Noreg òg.

Ei utfordring med dette er at ikkje alle klassikarar i den tyskspråklege verda har like klår klassikarstatus hjå oss.

Dreg ut i verda

Riddarlegenda om das Kind im Mann, unge Parsifal som dreg ut i verda utan kunnskap og røynsle, har nok hint til mange nordiske legender òg, både Peer Gynt og Oskeladden og Nils Holgersson. Men den konkrete forteljinga er ikkje utan vidare heimleg her på berget. Framsyninga Parsifal på Trøndelag Teater er spanande å sjå, men ikkje alltid lett å følgje med på.

Mennesket Parsifal har vakse opp utan å kjenne verdas farar og vondskap, godt hegna av ei mor som visste altfor mykje om krig, hat og elende. Når han slit seg laus og får ambisjonar, især om å få seg ein riddarplass ved det runde bordet, må han gå både i tunge motbakkar og over lik, og han når langt om lenge fram til ei endeleg erkjenning.

Naken uskuld

På scena vert Parsifal spelt av unge Kenneth Homstad, bokstaveleg talt naken mesteparten av tida, men med ei uskuld i det nakne som tilsvarer karakteren han skaper. Når han mot slutten får nokre tekstilar på seg, ser vi det desillusjonerte i andletet hans. Resten av ensemblet spelar fleire roller kvar, og det må vedgåast at nett dette tilslører handlingsgangen ein del, av di vi ikkje alltid skjøner korkje relasjonane eller motiva for gjerningane.

Det beste ved framsyninga er det strengt visuelle, der både scenebilete, kostyme og lysbruk skaper ein sterk tråd frå det legendariske fram mot det framtidige.

Skodespelarane har òg ein samkøyrd energi som kvitterer for ein inspirerande instruktør. Heilt kloke blir vi kan hende ikkje på progresjonen i reisa til Parsifal, men eit kraftfullt uttrykk sit vi i alle høve att med etter teppefall.

Bent Kvalvik

Bent Kvalvik er filmarkivar og fast teatermeldar i Dag og Tid.