Haugesund Teater

Klas Abrahamsson:

Oljå – en musikal

Komponist: Anders Brunvær Hauge
Omsetjing: Thomas Bye
Regi: Ida Høy
Scenografi: Gjermund Andresen

Det er 50 år sidan Statoil blei oppretta, og Haugesund Teater markerer jubileet på sitt vis. For å unngå nasjonal sjølvdyrking har dei bede dramatikaren Klas Abrahamsson frå det oljefattige Sverige om å levere eit kritisk sideblikk på ulike sider ved oljerikdommen og kva han har gjort med oss.

Første halvdel av framsyninga gir ei humoristisk framstilling av den tidlegaste oljehistoria, før vi fann olje på norsk kontinentalsokkel. Den delen er av ujamn kvalitet og kunne ha vore korta noko ned. Men stor speleglede, smittande entusiasme og høg sjarmfaktor, der især Ane Skumsvoll og Henrik Bjelland utmerker seg, gjer opp for mykje.

Etter pausen stikk Abrahamsson kniven i den norske oljesjela. Det skjer stadig med humor og satire, men er ofte så råkande at det kjennest. Nasjonalismen og sjølvgodheita får sitt, like så oppfatninga om at det vi produserer, er det reinaste i heile verda. Og den feite velstandsnordmannen med sine nye vaner og aukande krav til velstand blir avkledt. Men i den litt langdryge avslutninga syner oljegudinna at ho vil oss vel, vi får plass i den nye arka medan andre må møte undergangen.

Det finst knapt ein replikk som ikkje blir sungen, alt er sett velfungerande musikk til, som rett nok ikkje alle medverkande beherskar vokalt like godt. Men framsyninga har så mykje galskap, publikumsfriing og overskot at dei fleste veikskapane kan tilgjevast.

Jan H. Landro

Jan H. Landro er forfattar, journalist og fast teatermeldar i Dag og Tid.