Teatret Vårt

William Shakespeare:

Tvillingene (The Comedy of Errors)

Versjonering og regi: Kjetil Bang-Hansen
Scenografi og kostyme: Even Børsum

Regionteateret for Møre og Romsdal, Teatret Vårt i Molde, feirar 50-årsjubileum i haust. Til jubileumsframsyning har dei valt å invitere ein av gründerane, Kjetil Bang-Hansen, til å setje opp den same komedien han fekk opne teateret med i 1972, nemleg Tvillingene av Shakespeare.

Attpåtil er to av skodespelarane frå den gongen, Nils Vogt og Kirsten Hofseth, inviterte som gjester til å spele i sjølvsame komedie ein gong til, om enn ikkje i same roller som då. Det er eit tiltalande repertoarval, og sikkert populært for eit lokalt publikum med godt langtidsminne.

Forvikling og eventyr

Utfordringa med Shake­speares komediedramatikk er at dei fleste stykka er både forviklingsfarsar og poetiske eventyrspel, samstundes. Det er heller sjeldan vi ser framsyningar som meistrar denne balansen fullt ut. Utan å ha sett tolkinga til Bang-Hansen i 1972 skjøner vi likevel fort at dette ikkje er noka faksimileoppsetjing à la The Mousetrap, Agatha Christie-stykket som har gått 71 år i London.

Tvillingene er denne gongen ei effektiv, komprimert teaterhending i vår tids teaterspråk, både tekstleg og musikalsk ein gjennomført svingom mellom det tidlause og det lett gjenkjenneleg dagsaktuelle. Scenebiletet er ein liten dreiescene som syner eit antyda småbylandskap på framsida og nærast eit dokkehusmiljø på baksida. Assosiasjonane går faktisk fort til den standardiserte scenografien på Thorbjørn Egners Kardemomme by.

føreseieleg

Stykket er hovudsakleg tufta på to skodespelarar og deira vitalitet til å spele to personlegdomar, både seg sjølv og sin eigen tvillingbror. Det kan bli moro når det lukkast, og det er i og for seg ingen fare når skodespelarane er Nils Vogt og Kim Haugen.

Når vi likevel ikkje ler så mykje som vi hadde venta, kjem det nok av at komedierutinane verkar heller velbrukte og føreseielege, og publikumsfriande songinnslag som «Stjæl litt fra Shakespeare» er rett og slett, ja, orsak, direkte smisking for galleriet.

Resten av skodespelar­-
ensemblet kjem liksom aldri heilt til sin rett, heller ikkje den flotte Kirsten Hofseth, som har glitra i så mange store roller heilt sidan 60-talet. Her er ho mest sett til å sitere lyriske Shakespeare-liner frå heilt andre stykke enn Tvillingene. Det fungerer ikkje fullt ut, og det stadfestar diverre at ein heller ikkje denne gongen har heilt greidd å formidle meisterens kombinasjon av situasjonskomikk og poesi.

Bent Kvalvik

Bent Kvalvik er filmarkivar og fast teatermeldar i Dag og Tid.