Oslo Nye,
Teaterkjeller’n

Kari-Ann Grønsund:

Kari-Ann ­– ærlig fortalt

Regi: Petter Næss
Musikalsk følgje: Tove Kragset
Lysdesign: Anders Audum
Dramaturgi: Myrann Sørbøe og Marianne Sævig

Teatersjangeren «sjølvbiografisk standup» breier stendig om seg på norske scener, og no byrjar vi å bli fortrulege med at dette er ein etablert del av repertoaret. Sjangeren har nok kome av di medieinntrykka i dag er så mange og teateret synest det må finne ein plass i dette direkte, rett-på-klimaet som tradisjonelt sett er teateret fjernt, iallfall om ein tenkjer på teater som fiksjon, ein arena for å representere noko anna enn seg sjølv. Utfordringa er sjølvsagt at dette er eit grenseland mellom fiksjon og dokumentar. Det som vert fortalt, gjev seg ut for å vere sant, men like fullt er det ei regissert framsyning, planlagd i minste detalj og spela etter same lest kvar kveld.

Den likande skodespelaren Kari-Ann Grønsund har vore ein del av andletet til Oslo Nye Teater i nær 45 år. Nett av di Oslo Nye Teater er eit komedieteater, er det naturleg at vi assosierer henne med muntre, trivelege rollefigurar. Når ho no i si eiga personlege form kan fortelje at livet hennar ikkje alltid har gått på skjener, men tidvis har innehalde både påkjenningar og overraskingar av eventyrleg art, er det ikkje vanskeleg å ta henne på alvor, både i teatral og menneskeleg forstand. Det intime spelelokalet Teaterkjeller’n gir ikkje mykje rom for å skjule seg bak opplagde klisjear, og Grønsund meistrar vakkert å halde både ein profesjonell kontroll over «showet» ­– og å vere ekte, autentisk.

Ein tilsett ved Oslo Nye Teater sa ein gong til meg at det hjartelege ved Kari-Ann Grønsund ikkje berre var skodespel. Ho er slik, sa han. Heile mennesket er jo berre eit stort hjarte. Det kan ein merke i Teaterkjeller’n òg.

Bent Kvalvik

Bent Kvalvik er filmarkivar og fast teatermeldar i Dag og Tid.