Teater Innlandet

Dennis Magnusson:

Den enfoldige morderen

Fritt etter Hans Alfredssons bok En ond man og film Den enfaldiga mördaren
Omsett av Ragnar Olsen
Regi: Petter Næss
Scenografi: Dagny Drage Kleiva

Då den populære Hans Alfredsson, halvparten av film- og revyduoen Hasse og Tage, kom med filmen Den enfaldiga mördaren i 1980-åra, var det eit lite kultursjokk for mange av oss. Vel kjende vi komikarane Hasse og Tage som samfunnskritiske, men dei var mest av alt morosame. Denne beintøffe skildringa av maktmisbruk og elende i Bygde-Sverige i 1930-åra var for eit norsk publikum eit velretta spark i jappetida. I dag er denne historia eit endå strammare apropos til nynazismen og det nymaterialistiske klassesamfunnet som ulmar i Skandinavia.

Teater Innlandet har gripe fatt i stoffet med ein meir stilisert dramaturgi enn i filmen. Det er naturleg nok: På ei scene, i eit ståande scenebilete, må ting forteljast annleis enn i ein film. Petter Næss har gitt godt spelerom for sterke, klåre og ærlege rollefigurar.

Det minst effektive ved framsyninga er forteljarteatersekvensane og forsøka på humoristisk flørt med publikum ved opninga av både første og andre akta. Det harmonerer ikkje med resten av innhaldet. Elles er vi tungt gripne av mellom anna Tom Styve som den undertrykte, men hjartegode Sven, Robert Skjærstad som den diabolske fabrikkeigaren, og i andre roller til dømes Eline Øverby og Marit Synnøve Berg. Nils Petter Molværs musikk styrker òg inntrykket av kryssing mellom tidsbilete og aktualitet.

Bent Kvalvik

Bent Kvalvik er filmarkivar og fast teatermeldar i Dag og Tid.