KOMEDIE/DRAMA

Regi: Benedikt
Erlingsson

Kvinne på krigsstien (Orig. tittel: Kona fer í strí?)

Med: Halldóra Geirhardsdóttir, Daví? ?ór Jónsson, Magnús Trygvason Eliasen

Kvinne på krigsstien er ikkje ein tradisjonell actionkomedie à la Beverly Hills purk eller Dødelig våpen, men den sprelske regissøren Benedikt Erlingsson byd på raust med humor og ikkje så reint lite action når vi følger dirigenten Halla (Geirhardsdóttir) som i løynd er ein slags klimaaktivist, eller kanskje miljøterrorist, som driv ambisiøse aksjonar mot straummastene til eit aluminiumsverk. Styresmaktene jaktar samfunnsfienden, som driv ein adopsjonsprosess på si.

Super helt

Halldóra Geirhardsdóttir er ein uventa actionhelt, men løyser oppgåva med bravur. Blikket lyser av beinhardt fokus og overtyding, med stoisk ro og minimalistisk mimikk. Ho er ein stabukk. Figuren får fleire dimensjonar gjennom mellom anna konflikten om rollene som mor og hemmeleg klimakjempar. Ho har ein og annan hjelpar som òg aukar djupna til figuren, i tillegg til at dei alle har humoristiske funksjonar. Ein spanskspråkleg kar som fans vil kjenne igjen frå Om hester og menn av same regissør, er eit vittig element som sender eit grelt ljos over korleis vi ser på folk utanfrå.

Islandsk natur skin. Stilen er grundig gjennomført. Pertentleg plasserte rekvisittar og folk med underfundige framtoningar skapar slåande bilete på rekke og rad. Musikken er kjempekjekk, med musikarane godt synlege i biletet. Eit ompaband verkar stole frå Roy Andersson, og eit ukrainsk kor vrir godt opp på absurditetsskalaen. Alt krydrar rammene rundt den supre helten.

Ville verdiar

Kvinne på krigsstien kjem i rett tid. Filmen ber politisk brodd og tyngde, sjølv om han er full av tull, og humor og stil held i lange banar for å drøyme seg vekk i kinosetet. Galskap og gode verdiar står i skjønn foreining.

Benedikt Erlingsson er ein innfallsrik og kunnskapsrik filmskapar. Den briljante debuten Om hester og menn var ei rekke små absurde historier. No set ein av Nordens villaste filmstemmer fokus på ei historie som har større publikumspotensial. Politikarar og potensielle aktivistar har å møte. Slike filmar ser vi gjerne fleire av frå Noreg òg.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.