På nettsida 1picasso100euros.com kan ein vere med i eit lotteri der førstepremien er eit måleri signert den spanske kunstnaren Pablo Picasso, den mest førande kunstnaren på 1900-talet. Han var mellom anna med på å utvikle kubismen. Det utlodda verket «Nature Morte» frå 1921 er karakteristisk for perioden, der det figurative motivet vert løyst opp i geometriske flater. Her er det så vidt vi anar at motivet er eit stilleben av eit bord med avisa Le Journal, ein vase og ein duk.

Den noverande eigaren av måleriet er samlaren David Nahmad, som har ei av verdas største samlingar av den spanske kunstnaren. Samlaren får éin million euro av den innsamla summen. Resten går til eit humanitært føremål som i år er å blant anna bygge og forbetre brønnar i Kamerun, Madagaskar og Marokko.

Det er den velgjerande organisasjonen Care som loddar ut eit Picasso-måleri, noko dei òg gjorde i 2013, då dei samla inn 4,8 millionar euro til eit prosjekt i Libanon. I 2013 var det ein 25-åring frå Pennsylvania som vann «L’Homme au Gibus» frå 1914. Den franske foreininga Aider les Autres (Hjelp dei andre) administrerer lotteriet.

Kan hende norske velferdsorganisasjonar kunne ha late seg inspirere av modellen? Kunstnarar vert jamleg bedne om å donere verk til gode formål, og mange gir fleire verk i året utan å ta betalt. Dette er tankevekkande. Kunstnarar er ei lågtlønt yrkesgruppe, dei kunne sanneleg trenge pengane sjølve. Så kvifor ikkje betale kunstnaren gjennom summen som vert samla inn?

Trekninga i det spektakulære Picasso-lotteriet skjer 30. mars i år og vert strøymt direkte på 1picasso100euros.com. Men det spørst om den heldige vinnaren vågar å henge verket til ein verdi av over ti millionar norske kroner over sofaen.

Eva Furseth