Jazz

Bye Lila

And Then Summer Came

Lisbeth-Anita Grimsø Olsen, vokal; Liv Andrea Hauge, piano; og Arktisk Filharmoni (10).
Nice Things Records

Lisbeth-Anita Grimsø Olsen og Liv Andrea Hauge har samarbeidd heilt sidan dei møtte kvarandre på Noregs musikkhøgskule i 2016. Dei har samarbeidd om fleire prosjekt, mellom anna bandet Ladybird Orchestra, som kjem med den andre plata si til våren. Her dei toeine i selskap med flygelet.

Dei ti låtane er skrivne av Hauge og Olsen, og den sistnemnde har skrive tekstane. Dei sentrallyriske tekstane er enkle, konkrete og heller biletfattige, men dei funkar fint i dei sparsame musikalske omgjevnadene. Poesien ligg i første rekkje i det sensitive samspelet. Melankolien er ein fast følgjesvein på alle ti spora, sjølv på den lettbeinte og muntre «Sunblinded», der Hauge improviserer elegant på modifisert piano.

Hauge legg ofte eit fundament av brotne akkordar som gjev eit svevande musikalsk underlag for Olsen. Det vokale uttrykket varierer frå det eteriske til det venlege, men bestemte. Dynamikk og pausar er sentrale verkemiddel. Eit strålande døme på dette er «Only You».

And Then Summer Came er ei kammermusikalsk perle. Det er såleis spanande å lytta til samarbeidet duoen hadde med Arktisk Filharmoni, men Aleksander Waaktaar har skrive eit strykearrangement som tek vare på kvalitetane til duoen som duo og tilfører ein svært så høveleg klangpalett. «Quiet Breath of Winter» er faktisk saman med «Improvisation II (Sound of Traffic)» høgdepunktet på ei gjennomført sterk plate.

Lars Mossefinn

Lars Mossefinn er frilans journalist og fast jazzmeldar i Dag og Tid.