Ordets makt
Linda Boström Knausgård skriv med djup og nærverande innsikt i barnesinnet.
Tre av bøkene til Linda Boström Knausgård er omsette til norsk.
Foto: Christina Ottosson Øygarden
Forfattarskapen til Linda Boström Knausgård (f. 1972) omfattar fire titlar over 19 år: ei diktsamling, ei novellesamling og to romanar. Samla er det under 400 sider, omtrent på linje med ein roman av ektemannen Karl Ove Knausgård. Men kvalitet har ingen ting med sidetal å gjere, og det eksklusive i Linda Boström Knausgårds forfattarskap kan ingen trekke i tvil. Velkommen til Amerika er den tredje boka hennar på norsk, alle omsette av Monica Aasprong.
Urscene
Den ulukkelege familien er ei urscene i litteraturen der mellommenneskelege relasjonar speler seg ut i eit fortetta og intenst kammerspel, og det er dette som er utgangspunktet for Boström Knausgård når ho går inn i og portretterer den elleveårige Ellen, tidleg i puberteten, men med barndommens magiske tenking intakt. Ho bur saman med mora og broren. Den alkoholiserte faren er død samtidig som han enda lever i Ellen i kraft av ei sterk skuldkjensle for at han er borte. Ho har nemleg bedt til Gud om at han skulle dø, og i spennet mellom dødsdrift og livslyst prøver Ellen på sitt vis å takle tilværet ved å nekte å snakke. Ho stenger seg inne i seg sjølv, broren spikrar igjen døra til rommet sitt og mora lever i kunsten som skodespelar på Dramaten. Denne trykkande avstanden i familien blir berre forsterka gjennom mora si insistering på at «vi er en lys familie» og ei vegring mot å søke profesjonell hjelp.
Ellen slit med ei sterk frykt for å bli vaksen: «Jeg sluttet å snakke da voksingen tok for stor plass i meg». Ved å stanse språket kan ho også stanse den fysiske veksten, og ho ber til Gud om å sleppe å bli vaksen, for ho har opplevd ordets makt gjennom farens død. Denne barnlege måten å kontrollere gjennom tagnad og fråvær blir samtidig den ultimate provokasjonen i møtet med dei næraste og i møtet med omverda.
Skjørt og poetisk
Likevel har ho ei forankring i språket gjennom ei ubrukt skrivebok og gjennom timar i teateret saman med mora. Samtidig har ho døden på rommet sitt gjennom ein kniv ho har gøymt, og i dette spennet lever ho med ein lengt etter å bli sett og forstått og tatt vare på.
Digital tilgang – heilt utan binding
Prøv ein månad for kr 49.
Deretter kr 199 per månad. Stopp når du vil.
