Nominert til Oscar

Å bli nominert til Oscar-prisen får ikkje alle oppleva. No er filmane som er «langlista» til dei ulike Oscar-kategoriane, offentleggjorde, og lista over nominerte kortfilmar er interessant for bokglade nordmenn: Lista inneheld 63 titlar, berre fire nordiske filmar er med, og ein av dei er filmen til barnebokforfattar Elin Grimstad, som gav ut Månen som ville lyse som ei sol på Samlaget i 2012. Grimstad er nominert med animasjonsfilmen Eternal Hunting Gounds. Neste steg i prosessen er at lista på 63 filmar skal kokast ned til fem nominerte.

Årets bibliotek 2017

Sidan 1988 har Norsk Bibliotekforening delt ut prisen for Årets bibliotek. I år kom det inn 25 framlegg, melder dei i ei pressemelding. Av dei har ein jury plukka ut tre nominerte: Gulskogen skolebibliotek, Biblo Tøyen og Stormen bibliotek. Vinnaren blir annonsert 11. januar 2018. Prisen er ein kunstgjenstand, står det på nettsidene til Norsk Bibliotekforening.

Orwell ruvar

No kan tilsette i BBC i London nyte synet av ein ruvande statue av ei legende i engelsk litteratur, forfattaren George Orwell, som mellom anna er kjend for Animal Farm. Statuen er utførd av Martin Jennings, og viser ein framoverlend Orwell med ein sigarett i handa. Han er plassert ved Broadcasting House. Tida som radioreporter i BBC var stutt; Orwell slutta alt etter to år, i 1943, for å bruke meir tid på skriving. BBC-tilsette seier til The Guardian at statuen inspirerer dei til å «jobbe hardare og stille dei brysame spørsmåla».

ronny@dagogtid.no