Jazz

Palle Mikkelborg/ Jakob Bro/ Marilyn Mazur:

Strands

Palle Mikkelborg, trompet og flygelhorn; Jakob Bro, gitar; Marilyn Mazur, perkusjon. ECM

Konserten i Danmark Radios konsertsal i februar i år sameiner tre leiande krefter i dansk jazz. Konserten er også ein milepåle fordi Mikkelborg er attende på konsertscenen og tek opp att det over ti år gamle musikalske samarbeidet med Bro.

I 2018 kom plata Returnings (ECM), der Bro og Mikkelborg samarbeidde med den amerikanske bassisten Thomas Morgan og Jon Christensen. Plata er ein oppfølgjar til Gefion, med trioen Bro, Morgan og Christensen, som kom tre år før. Dei seks komposisjonane på Strands er henta frå dei to nemnde utgjevingane og førte i pennen av Bro og Mikkelborg.

Sjølv om låtane har ein klar identitet, svekkjer det ikkje kjensla av å bli teken med på ei tre kvarters musikalsk reise kjenneteikna av kontemplasjon, ettertanke, vemod og sorg.

Opningskuttet «Gefion», som skapar assosiasjonar til Zawinuls «In a Silent Way», set an grunntonen i den musikalske reisa som munnar ut i ein kort versjon av «Lyskaster». «Returnings» representerer eit brot både dramatiske og dynamisk, men er like fullt ei side ved grunnforteljinga. Låten syner også Mikkelborg på sitt mest Miles- og blues-inspirerte.

Christensen og Mazur representerer på mange vis motsetnader i perkusjonsstil, men musikken legg sterke føringar, og Mazur nyttar berre ein avgrensa del av instrumentariet og er heile vegen diskret fargeleggjande. Ei utgjeving dei tre danske meistrane kan vera stolte av.

Lars Mossefinn

Lars Mossefinn er frilans journalist og fast jazzmeldar i Dag og Tid.