Folkemusikk

Mojna:

Väntenätter

Thomas Eriksson: gitar; Helga Myhr: hardingfele og vokal; Anna Malmström: klarinett og bassklarinett. Heilo

Mykje av den nyare, samspelsbaserte nordiske folkemusikken har utspring i Sverige. Og norsk-svensk samarbeid finst det mykje av. Kjende veteranar er Gunnar Stubseid og Ale Möller. Blant dei yngre kan nemnast gruppa Sver og Sigrid Moldestad, som har samarbeidd med ei rekke svenske musikarar. Trioen Mojna representere såleis ikkje noko nytt, men føyer seg fint inn i rekka av liknande konstellasjonar.

Thomas Eriksson spelar akustiske gitarar og har komponert all musikken på den andre plata til trioen. Opningssporet er svært dvelande, og det er så vidt musikarane lagar lyd i instrumenta. Slik sett minner dette om mykje av den samtidsmusikkinspirerte (og ofte improvisasjonsbaserte) folkemusikken, men det tar ikkje lang tid før ein kjenner att rytmikk og melodiske motiv som like gjerne kunne vore henta frå tradisjonell folkemusikk.

Samspelet til denne trioen er ikkje av det kraftfulle, utåtvende slaget. Det er snarare prega av ein kammermusikalsk og disiplinert interaksjon og dominert av mjuke klangar. Det inneber slett ikkje at det verkar stivt eller nervøst, men at det er ei gjennomført ro over spelet, og at gitarist Eriksson, felespelar Myhr og klarinettist Malmström aldri går i vegen for kvarandre. Rett som det er, tilføyer dessutan bassklarinetten ein mørk og varm klang som kler uttrykket svært godt.

Dersom nokon vart nyfikne på korleis dette fungerer på scenen, vert det heile tre høve til å høyra Mojna på folkemusikkfestivalen i Førde til sommaren.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.