Pop

Kesha:

Gag Order

RCA / Kemosabe

Gag Order er den amerikanske popartisten Keshas femte studioalbum. Musikken blei skriven i covid-19-isolasjon og er laga i samarbeid med veteranprodusenten Rick Rubin, som har jobba med eit vell av kjente artistar innan vidt forskjellige sjangrar. Nokre døme: Public Enemy, Run DMC, Aerosmith, Metallica og Johnny Cash.

Albumet er ei eklektisk, personleg og sjenerøs handsaming av vanskelege kjensler som angst, depresjon, aggresjon og sorg. Spor etter Keshas karakteristiske uttrykk er å høyre i mangt eit medrivande riff og songbare melodiline, men tyggispopstilen har blitt lagt til sides til fordel for eit meir mangefasettert og sårt uttrykk.

Her syng Kesha i gospelkor med seg sjølv, og polymetriske vokalostinat ligg i lag etter lag over tunge basstrommer, kjenslevare kassegitarar, TV-spel-aktige synthliner og eksperimentelle komposisjonar kring samplingar av åndelege guruar. Albumet syner at ho har eit langt større register som songar, låtskrivar, arrangør og lyrikar enn iallfall underteikna har vore klar over.

Kesha har fortalt i minst to intervju at Gag Order til dels blei til i kjølvatnet av ei spontan åndeleg oppvakning, som skjedde då katten hennar kom spradande med hovudtelefonar i munnen og slengde dei i fanget hennar som for å seie at det var på tide å meditere. I same handvending har ho sagt at grensa mellom å vere opplyst og sprø er hårfin.

Plata er prega av ein underleg og mangefasettert ubalansegang inn i og mogelegvis gjennom ambivalensen som rett som det er pregar den menneskelege opplevinga. Dette er eit snålt, sårt og fengjande døme på at popmusikken har blitt djupare og meir ærleg etter pandemi. Trur eg.

Rasmus Hungnes

Rasmus Hungnes er kunstnar, musikar og fast musikkmeldar i Dag og Tid.