Samtidsmusikk

Henrik Munkeby Nørstebø:

Dystopian Dancing. For amplified trombone and object orchestra

Made now music

Henrik Munkeby Nørstebø er ein trombonist som arbeider med improvisasjonsbasert samtidsmusikk, ofte i samarbeid med dansarar eller biletkunstnarar, men òg som ensemblemusikar i gruppene Skadedyr og Aksiom.

Dystoping Dancing er den tredje soloplata hans, som ber undertittelen For amplified trombone and object orchestra. Det er tale om konsentrert arbeid med utforsking av trombonens klanglege potensial, ofte på ein slik måte at instrumentet framstår som uattkjenneleg. I tillegg til elektronikk vert det nytta ulike tilleggsobjekt som manipulerer lyden – noko som er i slekt med det meir kjende fenomenet «preparert piano», der ein puttar ymse ting mellom strengane på pianoet for å endra klangen.

Medan mykje av dagens musikk berre er digitalt tilgjengeleg, er dette ein slags hybrid: Musikken er tilgjengeleg frå ymse strøymetenester, eller – med høgare lydkvalitet – via nedlastingskode. Men det ein elles kjenner som plateomslag eller cover, er ein fysisk publikasjon i form av eit lekkert hefte som inneheld små fotokunstverk utførte av komponisten under innspelingsperioden.

Og som så mange alternative produksjonar er ikkje dette spelt inn i noko vanleg studio, men dels i eit nedlagt skulehus og dels i Emanuel Vigeland mausoleum, som har vidgjeten etterklang.

Denne utgjevinga utgjer ein stramt komponert verk der lyden og den medfylgjande trykksaka (eller omvendt) utgjer ein fascinerande heilskap.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.