Folkemusikk/samtidsmusikk

Benedicte Maurseth:

Hárr

Benedicte Maurseth, hardingfele; Mats Eilertsen, kontrabass og elektronikk; Håkon Mørch Stene, vibrafon, perkusjon og elektronikk; Jørgen Træen, elektronikk; Rolf-Erik Nystrøm, saksofon; Stein Urheim langeleik, munnspel, elektronikk, sampling og perkusjon. Hubro Records

Hárr er det norrøne namnet på fjellet Hårteigen, som med si karakteristiske hatteform kneisar 1690 moh. vest på Hardangervidda. Hárr er også namnet på tingingsverket Maurseth framførte på Hardanger Musikkfest i 2019 saman med Eilertsen og Stene, og no tittel på plata der musikken frå tingingsverket utgjer hovudtyngda.

Maurseth har òg funne plass til to låtar av medmusikant og produsent Urheim, «Kollasj I» og «Kollasj II». Sistnemnde inkluderer eit fascinerande utdrag av eit intervju med oldefar til Benedicte, Leif Maurseth.

Maurseth er ein del av ein moderne norsk musikktradisjon der musikarar og komponistar som Nils Økland, Erlend Apneseth, Terje Isungset og Karl Seglem også høyrer med. Hjå Maurseth, som har vore elev av Knut Hamre, er linjene attende til det tradisjonelle slåttespelet tydelege.

Sampling av dyrelydar og stein som slår mot stein, brukt i umodifisert form, gjev saman med studioklangen eit sterkt nærvær og sterke assosiasjonar. Olav H. Hauge avsluttar «Din veg» med «Og vinden stryk ut ditt far i aude fjell». Musikken til Maurseth hjelper deg å finna att desse fara.

Overtoneregisteret i dei akustiske instrumenta smeltar saman med elektronikken og samplingane i ein orkestral heilskap, for så å bli teke ned til dei varaste bjølleklemt. Musikken er heile vegen lågmælt og kontemplativ, men likevel med ein sterk dynamikk. Bandet demonstrerer ei kollektiv fingerspisskjensle som imponerer. Ein musikalsk tur på Hardangervidda med Benedicte Maurseth kan tilrådast på det varmaste.

Lars Mossefinn

Lars Mossefinn er frilans journalist og fast jazzmeldar i Dag og Tid.